ფრანგული პსჟ-ს ხელმძღვანელობა იტალიური "ნაპოლის” ფორვარდის, ედინსონ კავანის შეძენით დაინტერესდა. საფრანგეთის უმაღლესი დივიზიონის ოფიციალური საიტის ცნობით, პარიზელები ნეაპოლელებს წინადადებით უახლოეს მომავალშივე მიმართავენ.
"სიამოვნებით ვიქნებოდი დიეგო ლუგანოს თანაგუნდელი. ჩვენ შესაძლო ტრანსფერზე უკვე ვისაუბრეთ. ჯერჯერობით, ფიქრის პროცესში ვარ”, - განაცხადა 25 წლის ურუგვაელმა.
აღსანიშნავია, რომ თავად თავდამსხმელის აგენტი კლაუდიო ანელუჩი თავისი კლიენტის საფრანგეთში შესაძლო გადაბარგებას არასერიოზულად მიიჩნევს:
"კავანი პსჟ-ში? მოდით, სერიოზულები ვიყოთ. ამ ეტაპზე, ეს ტრანსფერი გამორიცხულია. ფეხბურთელის მსურველი კლუბებისგან ოფიციალური შემოთავაზებები საერთოდ არ მიგვიღია”.
შეგახსენებთ, რომ ურუგვაელისადმი ინტერესს ინგლისური "მანჩესტერ სიტიც" იჩენს.

რუსული კლუბი "ანჟი" არგენტინელი ლიონელ მესის და პორტუგალიელი კრიშტიანო რონალდოს შეძენას ეცდება.

"ანჟის" დირექტორის, რობერტო კარლოსის თქმით, მესი და რონალდო შეთავაზებას მაშინ მიიღებენ, როდესაც თავიანთ კლუბებთან - "ბარსელონასა" და "რეალთან" კონტრაქტები დაუსრულდებათ.

რობერტო კარლოსმა ეს განცხადება 13 მარტს რადიოსადგურ Radio Marca-ს ეთერში გააკეთა. ბრაზილიელმა აღნიშნა, რომ ამ დროისთვის მსოფლიოს საუკეთესო ფეხბურთელად მესის მიიჩნევს, თუმცა ორ ვარსკვლავს შორის არჩევანის გაკეთებისას უპირატესობას ვერცერთს მიანიჭებს.

მესის "ბარსელონასთან" კონტრაქტი 2015/16 წლების სეზონის ბოლომდე აქვს გაფორმებული. კრიშტიანო რონალდომ, რომელიც "რეალში" "მანჩესტერ იუნაიტედიდან" 2009 წელს გადავიდა, კონტრაქტი 2014/15 წლების სეზონის ბოლომდე გააფორმა.