პოპულარულ გამოცემა "სპორტ-ექსპრესთან" საუბარში ერთ-ერთმა ყველაზე ტიტულოვანმა რუსმა მწვრთნელმა, ოლეგ რომანცევმა ბოლო წლებში "სახალხო გუნდის" წარუმატებლობის ერთ-ერთ მიზეზად მოთამაშეთა საკლუბო პატრიოტიზმის ნაკლებობა დაასახელა.

სწორედ ამ დროს ახსენა მან "სპარტაკის" ქართველი ნახევარმცველი ჯანო ანანიძე:

"ჩემი აზრით, სპარტაკელ ახალგაზრდებს საკლუბო პატრიოტიზმი აკლიათ... ძირითად შემადგენლობაში ხვდებიან და თვლიან, რომ მორჩა, ეს მწვერვალია, აქვთ კონტრაქტი, რა საჭიროა ბევრი წვალება, შეკრებაზე ტანჯვა, რეჟიმის დაცვა, ბურთისთვის ბრძოლა - ტრავმის მიღების რისკი ხომ არსებობს...

ამიტომაც არ ვიცი, როდის გაიზრდებიან მომავალი ჩერენკოვები, გავრილოვები, სტრელცოვები, იაშინები, დასაევები.

არა იმიტომ, რომ ბუნებაში არ არიან, არამედ იმიტომ, რომ ახალგაზრდებმა საკუთარი თავის მიმართ მოთხოვნები შეამცირეს. ვუყურებთ ვარჯიშებზე და მათ თვალებში აზარტს ვერ ვხედავ. როგორც კი ძირითად შემადგენლობას მიუახლოვდებიან, მაშინვე ჩერდებიან. ეს ეხება ანანიძეს, ძიუბას, იაკოვლევს, კოზლოვს. მათ სრულად ვერ მოახერხეს პოტენციალის რეალიზაცია.

ანანიძეს შანსი ბევრჯერ მისცეს, მაგრამ შანსს გამოყენება სჭირდება!"

რა თქმა უნდა, ქობულეთელი ანანიძე "წითელ-თეთრი" ფორმის სიყვარულით ვერ და არც გაიზრდებოდა, მაგრამ რომანცევის გულისტკივილი გასაგებია - ანანიძისგან ქართველი გულშემატკივარიც მეტს ელის. დროა, ამ ნიჭიერმა მოთამაშემ თავისი სიტყვა თქვას კლუბში.

თუმცა, ღმერთმა უწყის, რა უშლის ხელს, რა პრობლემები ექმნება, ან რა სატკივარი აქვს, "სპარტაკიდან" უცხოეთში წასვლა რომ სურდა?