ესპანეთის 17-წლამდელთა ნაკრები შაბათს დილით ჩამოფრინდა საქართველოში და საღამოს 18 საათსა და 15 წუთზე დაიწყო "დინამოს" დიღმის ბაზაზე ვარჯიში. იუველირული სიზუსტის პასები, სწრაფი გადაადგილებები, მინიმუმამდე დაყვანილი ხარვეზები – სანტი დენიას გაწვრთნილები ბურთს, როგორც იტყვიან, ამღერებდნენ.
ვარჯიშს "დინამოს" ასაკობრივი გუნდის მწვრთნელებმა და კლუბის აკადემიის ესპანელმა ხელმძღვანელმა ანდრეს კარასკომაც უყურეს. იქ იყო გოჩა ჯამარაულიც, რომელიც აღტაცებას ვერ ფარავდა ესპანელი ჭაბუკებით.
"ნეტავ, ჯერ არ დამთავრდეს. რა მაგრები არიან... არა, რა, ამათი ყურება არ მომწყინდება" – ამბობდა ჯამარაული, რომელიც თავის მხრივ, სწორედ ტექნიკური და რბილი თამაშის მანერით გამოირჩეოდა.
შთამბეჭდავი იყო, თუ როგორ უბრალოდ, თვალის დახამხამებაში აკეთებდნენ "კვადრატისას" პასებს 16-17 წლის ჭაბუკები. ამას ფლანგურ შეტევებსა და ჩაწოდებებში ვარჯიში მოჰყვა, შემდეგ კი იყო ნახევარ მოედანზე ორკარა.
"თვალები არ აგიჭრელდა? ნახე, როგორ გადააქვთ ბურთი ერთიდან მეორე მხარეს" – ეუბნებოდნენ ქართველი მწვრთნელები ერთმანეთს.
ესპანელებს ახლავთ ცნობილი მწვრთნელი ხინეს მელენდესი, რომელიც წლების განმავლობაში ახალგაზრდული ნაკრებების კურატორია. ბევრისთვის სიახლე არაა, რომ ესპანეთის ყველა ასაკობრივი ნაკრები ერთ სათამაშო მოდელში, დელ ბოსკეს გუნდის იდენტურად თამაშობს. შესაბამისად, ახალგაზრდებს ზედა ასაკის ნაკრებში დაწინაურებისას დისკომფორტი და ადაპტაცია არ ემუქრებათ.
ვარჯიში ერთ საათს გაგრძელდა...
შეხსენებისთვის, საქართველო-ესპანეთის 17-წლამდელთა მატჩი 26 მარტს 14:00 საათზე დაიწყება "მიხეილ მესხზე". საქართველო, ესპანეთი, ინგლისი, უკრაინა – ევროპის ჩემპიონატის ელიტ-რაუნდის ჯგუფიდან მხოლოდ ერთი გადის ფინალურ ეტაპზე.