ევროტურნირებზე ყველაზე ხშირად "რეალი” და "ბაიერნი” ხვდებიან ერთმანეთს. მათი ურთიერთდაპირისპირების რაოდენობა 18 მატჩამდე ავიდა და სულ მალე 20 გახდება – გეცოდინებათ, ჩემპიონთა ლიგის ნახევარფინალში გაარკვევენ უძლიერესს. საინტერესოა, რომ "რეალმა” 4-ჯერ გადალახა "ბაიერნის” ბარიერი და ასევე 4-ჯერ გავარდა.
ისინი მხოლოდ ჩემპიონთა ლიგაში (ან ჩემპიონთა თასზე) ხვდებოდნენ ერთად. რა თქმა უნდა, აქ არაა შეტანილი ამხანაგურების სტატისტიკა. ამ გრანდების დაპირისპირებაში მხოლოდ ორჯერ დაფიქსირებულა დიდი ანგარიში და ორივეჯერ გერმანელებმა იმარჯვეს ერთნაირი ანგარიშით – 4:1.
საინტერესოა, რომ "სამეფო კლუბს” არასოდეს მოუგია მიუნხენში – მხოლოდ ერთხელ ითამაშა ფრედ, დანარჩენ 8 შემთხვევაში კი დამარცხდა.
1999/2000 წლების სეზონში "ბაიერნმა” სამი თვის ინტერვალში სამჯერ სძლია მადრიდელებს, მაგრამ მაინც გავარდა. საქმე ისაა, რომ ისინი მეორე ჯგუფურ ეტაპზე შეხვდნენ და ოტმარ ჰიტცფელდის შეგირდებმა შინაც იმარჯვეს და სტუმრადაც. ჯგუფიდან ორივე გავიდა, ხოლო ნახევარფინალში "რეალმა” "სანტიაგო ბერნაბეუზე” 2:0 იმარჯვა, სტუმრად 1:2 წააგო და ფინალში გავიდა, სადაც "ვალენსიას” 3:0 სძლია და თასი აღმართა.
პირველად ეს გუნდები 1976 წელს ნახევარფინალში გადაეყარნენ ერთმანეთს და ორი თამაშის ჯამში, მიუნხენელებმა 3:1 იმარჯვეს – სამივე ეს გოლი გერდ მიულერმა მიითვალა. იმ წელს "ბაიერნმა” ისტორიაში ზედიზედ მესამედ მოიპოვა ევროპის ყველაზე პრესტიჟული თასი.
ბოლო ურთიერთშეხვედრაში რეკორდიც დამყარდა: "ბაიერნმა” სტუმრად წაგებული 2:3 საშინაო 2:1-ით მოატრიალა და ჰოლანდიელმა როი მაკაიმ 10,2 წამზე გახსნა ანგარიში.
1975/1976. ჩემპიონთა თასი. ნახევარფინალი
რეალი-ბაიერნი 1:1 (მარტინესი 7; გერდ მიულერი 41), ბაიერნი-რეალი 2:0 (გერდ მიულერი 9, 31)
1986/1987. ჩემპიონთა თასი. ნახევარფინალი
ბაიერნი-რეალი 4:1 (აუგენტალერი 11, მათეუსი 30 პენ, 51 პენ, ვოლფარტი 37; ბუტრაგენიო 43), რეალი-ბაიერნი 1:0 (სანტილიანა 27)
1987/1988. ჩემპიონთა თასი. მეოთხედფინალი
ბაიერნი-რეალი 3:2 (პფლიუგლერი 40, ედერი 43, ვოლფარტი 48; ბუტრაგენიო 84, მანუელ სანჩესი 89), რეალი-ბაიერნი 2:0 (იანკოვიჩი 26, მიჩელი 42)
1999/2000. ჩემპიონთა ლიგა. II ჯგუფური ეტაპი
რეალი-ბაიერნი 2:4 (მორიენტესი 28, რაული 48; შოლი 21, ეფენბერგი 24, ფინკი 40, პაულუ სერჟიო 67), ბაიერნი-რეალი 4:1 (შოლი 4, ელბერი 29, ციკლერი 79, 90; ელგერა 50)
1999/2000. ჩემპიონთა ლიგა. ნახევარფინალი
რეალი-ბაიერნი 2:0 (ანელკა 4, იერემისი 33 საკ.კარში), ბაიერნი-რეალი 2:1 (იანკერი 12, ელბერი 54; ანელკა 31)
2000/2001. ჩემპიონთა ლიგა. ნახევარფინალი
რეალი-ბაიერნი 0:1 (ელბერი 55), ბაიერნი-რეალი 2:1 (ელბერი 8, იერემისი 33; ფიგუ 18)
2001/2002. ჩემპიონთა ლიგა. მეოთხედფინალი
ბაიერნი-რეალი 2:1 (ეფენბერგი 81, პიზარო 88; ჟერემი 11), რეალი-ბაიერნი 2:0 (ელგერა 69, გუტი 86)
2003/2004. ჩემპიონთა ლიგა. მერვედფინალი
ბაიერნი-რეალი 1:1 (მაკაი 76; რობერტო კარლოსი 83), რეალი-ბაიერნი 1:0 (ზიდანი 32)
2006/2007. ჩემპიონთა ლიგა. მერვედფინალი
რეალი-ბაიერნი 3:2 (რაული 10, 27, ვან ნისტელროი 33; ლუსიო 23, ვან ბომელი 88), ბაიერნი-რეალი 2:1 (მაკაი 1, ლუსიო 66; ვან ნისტელროი 83 პენ)
სულ: "ბაიერნმა” მოიგო 9-ჯერ, "რეალმა” 6-ჯერ, ფრედ დასრულდა 3-ჯერ. ბურთები 29:23 "ბაიერნის” სასარგებლოდ.
ეტაპების მიხედვით: 4-ჯერ "ბაიერნი” გავიდა შემდეგ ეტაპზე, 4-ჯერ – "რეალი”. ერთხელ ჯგუფში იყვნენ ერთად.
უშუალოდ ნახევარფინალურ სტადიაზე "ბაიერნმა” 3-ჯერ გამოთიშა "რეალი”, ერთხელ კი მადრიდელებმა გადალახეს ბარიერი.